LABEL DALAM HURUF

A B D G H I J L M N O P R S T U

III MUSA 24

III MUSA 24

24:1 Dung i ro muse ma hata ni Jahowa tu si Musa songon on:
24:2 Dokkon ma halak Israel, asa diboan nasida tu ho miak Jetun na niduda jala na tinapis bahen miak palito, asa tongtong galak palito i.
24:3 Ingkon di ruar ni rimberimbe na mangolat poti parpadanan i di bagasan undungundung parluhutan hobason ni si Aron palito i olat ni bodari sahat ro di manogotna i di adopan ni Jahowa. I ma aturan na hot salelenglelengna di pinomparmuna i.
24:4 Alai ingkon di atas parpalitoan sian sere na pita hobasonna tongtong angka palito i di adopan ni Jahowa.
24:5 Ingkon buatonmu huhut itak na lamot, jala masahanmu ma sian i sampulu dua sagusagu, ganup sagusagu i dua parpuluan.
24:6 Jala ingkon peakkononmu do i bahen dua timbunan, onomonom sada timbunan di atas meja sian sere na pita di adopan ni Jahowa.
24:7 Jala ingkon bahenonmu di atas ni ganup timbunan daupa na pita bahen pelean parningotan di roti i, i ma sada pelean api di Jahowa.
24:8 Ingkon gonop ari Sabbat do i hobasonna tongtong di adopan ni Jahowa sian halak Israel bahen padan salelenglelengna.
24:9 Jala ingkon jambar ni si Aron dohot angka anakna do i, sipanganonnasida do i di bagasan inganan na badia i, ai i ma apala na badia sahali di ibana sian angka pelean api na tu Jahowa, aturan na hot salelenglelengna do i.
24:10 Dung i ruar ma anak ni sada boru Israel, alai halak Misir do anggo amana, di tongatonga ni halak Israel; jadi marbadai ma anak ni boru Israel i dohot sahalak Israel di parsaroan.
24:11 Jadi diinsahi anak ni boru Israel i ma Goar ni Jahowa, laos mamburai ibana. Dung i diboan nasida ma ibana tu jolo ni si Musa; ia goar ni inana i ma si Selomit, boru ni si Dibri sian marga Dan.
24:12 Dung i dibahen nasida ma ibana tu bagasan hurungan, paima tangkas uhum dabuonnasida hombar tu hata ni Jahowa.
24:13 Dung i ro ma hata ni Jahowa tu si Musa songon on:
24:14 Togihon ma halak pamuraii tu balian ni parsaroan i, jala saluhut halak na umbege pamuraionna i, ingkon mangampehon tangannasida tu atas uluna, laos sandok luhutan i mandangguri ibana mate dohot batu.
24:15 Jala ingkon dohononmu ma tu halak Israel: Manang ise pe na mamburai Debatana, ingkon manginona tu ibana dosana i.
24:16 Jala manang ise na manginsahi Goar ni Jahowa, ingkon marutang hosa ibana, ingkon sandok luhutan i mandangguri ibana mate dohot batu, nang halak dagang, nang halak isi ni tano i hian, molo tung diinsahi Goar ni Jahowa, ingkon marutang hosa ibana.
24:17 Manang ise na mangompongi donganna jolma, pola mate, ingkon marutang hosa ibana.
24:18 Manang ise na mangompongi mate pinahan ni halak na asing, ingkon abulonna do i, pinahan singkat ni pinahan.
24:19 Manang ise na mamukpuhi donganna jolma, suang songon na binahenna bahenon tu ibana.
24:20 Bugang abul ni bugang, mata abul ni mata, ipon abul ni ipon; manang sahitsahit dia tahe binahenna tu donganna jolma, ingkon suang songon i bahenon tu ibana.
24:21 Asa manang ise na mangompongi mate pinahan, ingkon abulonna do i; alai manang ise na mambunu jolma, ingkon marutang hosa ibana.
24:22 Ingkon sisada uhum di hamu, di halak dagang, suang songon di halak isi ni tano hian; ai Ahu do Jahowa Debatamuna i.
24:23 Dung i dipatolhas si Musa ma hata i tu halak Israel, jadi ditogihon nasida ma halak panginsahi i ruar tu balian ni parsaroan jala mate ibana didangguri dohot batu. Asa dibahen halak Israel ma songon na tinonahon ni Jahowa tu si Musa.

III MUSA
PADAN NA ROBI
ALKITAB BAHASA BATAK
Lirik Lagu Suplemen Buku Ende
Lirik Lagu Buku Ende

No comments:

Post a Comment

Bila anda diberkati dengan artikel di atas dan Suka artikel ini? Klik Like, Tweet atau Share dengan teman Facebook anda:

Dapatkan Lirik Buku Ende dengan memasukkan alamat email, GRATIS:

Delivered by FeedBurner

COMMENT DI FACEBOOK